Zerodha Co-founder Nikhil Kamath Ka Podcast “WTF is” Mein Alag-Alag Fields Ke Guests Shamil Hote Hain.

Unke recent episode mein, jo longevity par based tha, unhone US millionaire Bryan Johnson ko invite kiya tha, saath hi kuchh aur guests bhi the, jo “health aur wellness ka future” discuss kar rahe the. Lekin American entrepreneur, India ki air quality se pareshaan ho kar, interview ko beech mein hi chhod kar chale gaye. Iske baad logon ne iss incident par kai tareeke ke comments diye. Ab anti-ageing influencer ne apni taraf se reason share kiya hai aur bataya hai ki unhone aisa kyun kiya.

Nikhil Kamath Ke Guest Ne Podcast Beech Mein Chhoda

Nikhil Kamath ke “WTF is” podcast ke latest episode ke dauraan guest ne interview beech mein hi end kar diya. (Instagram/@nikhilkamathcio)

Bryan Johnson ne apne post mein likha, “Jab main India mein tha, tab maine yeh podcast jaldi end kar diya kyunki air quality bohot kharab thi. Nikhil Kamath ek bohot ache host the aur hum achha samay bita rahe the. Lekin problem yeh thi ki jo room tha, wahan outside air circulate ho rahi thi, jiske wajah se jo air purifier maine laya tha, woh bhi kaam nahi kar raha tha.”

Unhone yeh bhi bataya ki India visit ke third day par unko rash aur throat burn hone laga tha, jo polluted air ki wajah se hua. Unka kehna hai ki India mein air pollution itna normal ho chuka hai ki log isse mehsoos bhi nahi karte, jabki science already bata chuki hai ki iska health par negative impact padta hai.

“Yeh Bohot Confusing Tha”

Unhone likha, “Log bahar bhaag rahe the, babies aur chhote bachche bhi janm se hi polluted air ke exposure mein hote hain. Koi mask nahi pehnta, jo exposure ko significantly reduce kar sakta hai. Yeh sab dekhna bohot confusing tha.”

Unhone aur aage likha, “Science ke evidence ke mutaabik, agar India apni air quality ko improve kar le, toh yeh logon ke health ke liye cancer cure karne se bhi zyada faydemand hoga.”

Bryan Johnson ka kehna hai ki jaise hi woh US wapas gaye, pollution-related problems khatam ho gayi. Lekin unhone ek aur cheez dekhi jo unke mutaabik air pollution se bhi zyada khatarnak hai— obesity.

Unka kehna hai, “42.4% Americans obese hain, jo long term mein pollution se bhi bada issue hai.”

Podcast Mein Kaun-Kaun Tha?

Iss episode mein Bryan Johnson ke alawa, Prashanth Prakash (Founding Partner, Accel Partners) aur Jitendra Chouksey (Founder, FITTR) bhi shamil the.

Saath hi, Nikhil Kamath ke bhai Nithin Kamath (Co-founder aur CEO, Zerodha) aur unki wife Seema Kamath (Director, Zerodha) bhi podcast ka hissa bane.