Nagpur ke Kuch ilakon mein curfew lag gaya hai kyunki Mughal Badshah Aurangzeb ki kabr ko Maharashtra se hatane ki maang ko lekar hinsa bhadak uthi hai. 17vi sadi ke is Badshah ki kabr Aurangabad mein hai, jise ab Chhatrapati Sambhajinagar ke naam se jana jata hai.
Nagpur police commissioner Ravinder Kumar Singal ne Bhartiya Nagarik Suradsha Sanhita ke Section 163 ke tahat ek notice jari kiya hai. Is notice ke mutabik, curfew Kotwali, Ganeshpeth, Tehsil, Lakadganj Pachpaoli, Shantinagar, Sakkardar, Nandanvan, Imamwada, Yashodharanagar, aur Kapilnagar Police station ilakon mein laga hai. Ye pabandi tab tak rahegi jab tak naya notice nahi aata.
Police commissioner ke notice ke anusaar, kal Vishwa Hindu Parishad aur Bajrang Dal ke Supporters Nagpur ke Mahal ilake mein Shivaji Maharaj ki murti ke paas ek protest kar rahe the.unka maanga tha ki Aurangzeb ki kabr ko Maharashtra se hatao. Unhonne naare lagaye aur Aurangzeeb ki ek tasveer aur “hari kapde mein bani ek symbolic kabr (ghaas se Bahari hui)” ko jala diya.
Reports ke mutabik, hari kapde ko jalane se afwah fail gayi kyunki kai logon ka kehna tha ki us par pavitr ayat (sacred verses) likhi hui thi. Is wajah se ilake mein tanaav badh gaya. Kal sham ko, ek khaas samuday ke 80 se 100 log hinsa par utar aaye. Unhonne police par patthar pheke aur kai gaadiyon ko aag laga di. Police ne halke lathicharge aur teargas ka istemal kiya. Halat ab contro main hai, lekin PTI report ke mutabim, 4 log ghayal ho chuke hain. 12 se zyada police walon ko bhi chot pahuchi hai.
Union minister aur Nagpur ke MP Nitin Gadkari ne shant rahne ki appel ki hai aur logo se kaha hai ki ve afwahon par bharosa na karein. Unhonne kaha, “Main aapko vishwas dilata hoon ki sarkar un logon ke khilaf kadi karvaayi karegi jo galati ya anyaay ka hissa bane hain. Mukhyamantri ko is halat ki jaankari de di gayi hai, isliye main sabse anurodh karta hoon ki ve afwahon par dhyan na dein.”
Hinsa se judi 50 logon ko giraftar kiya gaya hai. Ilake mein bhari police force tainat ki gayi hai.
Mukhyamantri Devendra Fadnavis ne logo se police ka saath dene aur kanoon vyavastha banaye rakhne ki appeal ki hai. Unhonne kaha, “Nagpur ek shantipriya Shahar hai jo ek doosre ke sukh aur dukh mein shareek hota hai. Aise mein kisi bhi afwah par bbharosa na karein aur prashasan ka sa saath dein.” Unhonne kaha ki hinsa karne walon ke khilaf kadi karvaayi ki jayegi.
Vipadsh ne is hinsa par sarkar ko dosh diya hao. Shiv Sena UBT ke MLA Aaditya Thackeray ne X (Twitter) par likha, “Rajya ki kanoon vyavastha bilkul dhwast ho chuki hai. Mukhyamantri aur Grih Mantri ka ghar Nagpur mein hai, lekin wahi Shahar is halat se guzar raha hai.”
NCP (Sharad Pawar ) ki Lok Sabha MP Supriya Sulle ne kaha ki Nagpur ki hinsa dukhad hai. Unhonne kaha, “Hum sabse anurodh karte hain ki ve afwahon par bharosa na karein. Hume milkar ek sahyog aur shanti ka mahaul banaye rakhna chahiye. Maharashtra pragatisheel vicharon ka rajya hti. Hume apne rajya ki pehchan ko banaye rakhna chahiye.”
Congress leader Pawan Khera ne kaha ki Nagpur ne apne 300 saal ke itihas mein dange nahi dekhe hain. Unhonne kaha, “Pichle kuch dino se 300 saal ke itihas ko hathyar banana aur iska istemal vibhajan aur ashanti failane ki koshish ki jar ahi thi. Ye jhagde sarkar ke vichar dhara ka asli chehra dikhate hain.”
